NEVEGA scritta e letta da Bruna Meneghello

Nevega

 

Và  fora a caminar fin che la neve scominsia,
lassa che le falíe lesiere le te gira intorno
le te toca el naso e i oci e  le se ferma su i to cavei.
Serca de confonderte nel bianco in dove non ghe più
nè tera nè ciel, non sta a meterte guanti e bareta.
Te vedarè le  peste  lasade da i polacheti novi,
quei che te trovavi  a Santa Lussia , rente al camin
co le manopole , fate a ucie ,de scondon , da tò nona,
co la bambola bela, massa bela per zugar tuti i dì.
No' fermarte, no' guardar le to peste che lassa  mace scure
tute in fila  nel bianco che cuerse la strada.
Speta che le falie , imbriaghe de vento, tuto le cuersa de novo.
Varda inansi n 'do tuto l'è neto , scolta el vento
che alita in facia, ma sta incorto,
se pol sempre sbrissiar.