Amor
tiènme par man da rènte.
Te me si stado arènte da matina.
Compàgneme al tramonto involtolàda
nel to tabàr fodràdo de speranse
e tra le ombrie che in tera se roèrsa
dame n'ultimo sogno a farme lume.
Se m'è cascà la fioca sui cavéi,
se'l sangue ralentando el me se sòra,
ti scàldelo in le vene intorcolàde,
ti ciàmelo dai polsi come a n'usso.
Falo scòrar boiéndo infin che'l sbòca
sbregàndo e strapegàndo drio la piena
àlsari insulsi e fòlpi de radise.
Svéieme el cor e ancora n'altra òlta
falo scombàtar ti, co-fa un tamburo
a la to canta antica come el mondo.
Cò le to mane mòrbie, vànti a note
carésseme la fronte, i labri, i oci
fin l'ultimo scalin del paradiso.
Su la me piera scrivi con i basi,
quei dadi, quei ciapàdi, quei mai vudi:
Vissuda par amar
l'à amà par vìvar.
(Wanda Girardi Castellani)
Nessun commento:
Posta un commento