SGOLAR VERSO ‘L SOL di ANNA MARIA LAVARINI

 

Debole è quell’ amore di cui più forte è la paura …

 

Sognava un amor grando, infogà,

fantasie che no podéa palesar.

 Onor,  pudor, timori,

anei de cadena, che me tegnea ligà
sul trespolo del vìvar
castighando le me ale, a voli curti.

Te s’eri rivado ti

e co’ ale slusenti te volei
portame nel ciel
a brusarme con ti, nel sol.

Avaria vussù vegnerte adrio

ma la paura, la fermà la voia…
ti te serà le ale e, te si restà
a spartir con mi, ‘n amor caldin…
‘n fogheto de candela.

A olte ne ciapa na voia

de rompar ste cadene rusenie,
e sgolar alto, drento in quel ciel…
ma le nostre ale falope
no le sarea pi bone
de ciapar ‘l volo,
solo i nostri sogni 
i sgola alti, libari verso ‘l sol.